【臺灣語文學系謝孟珈提供】「……孩子呀∕阿爸也沒有任何怨言∕只因這是生命中∕最沉重∕也是最甜蜜的負荷」。吳晟的詩句，陪伴逐家大漢，相信真濟人攏有印象。9月19李勤岸教授邀請到名作家嘛是幾十冬的朋友吳晟來到台師大演講，為這學期台文系台灣文化講座拍頭陣。雖然是佇暗時，猶原有規場滿滿的聽眾來參與，閣有袂少同學徛佇教室門邊捧場，可見吳晟老師有偌濟魅力矣。
吳晟老師以「挫傷的語言，語言的挫傷」做題，和逐家討論台灣語言流失的問題。伊表示無用家己的母語來創作，對伊來講是一件遺憾的代誌，毋過伊猶是有伊的方法，無論是透濫台語漢字來表達簡單的生活用詞，姑情孫仔講台語，猶是和後生吳志寧佮一寡音樂創作者來合作台語歌曲，總是欲共母語傳承落去。
吳晟老師用「物種」來比做「語言」，伊講「母語」就親像「原生種」的生物，本底就是上適合佇這塊土地生存、成長的；家己種田的伊，對植物有足濟心得，譬如伊認為「烏知」（烏心石）就是足好的台灣原生種，毋過這幾十年台灣的發展，無形中共真濟原底足好的物件和價值放捒去矣，包括語言，嘛包括生態，違背到環境和自然的倫理，這是真無彩的代誌。語言的消失就親像是物種的滅亡，所以若保留一種特別的台灣母語，就等於保留一種台灣特有種，會當予囝兒序小看到更加多元豐富的台灣文化，按呢敢毋是足好？
台跤的聽眾對吳晟最近參與守護水圳運動的過程真有興趣，吳晟老師嘛大方分享；伊講到社會運動中，政府、資本家、警察佮農民之間的關係，分析怹個別的操作手路佮策略，嘛質疑一般所講「合法」佮「違法」的定義。「自由袂家己對天頂落--落--來」，吳晟老師面對複雜的社會文化運動，就親像對母語的態度，有理想，嘛有伊家己實際的行動。
新聞投稿